الله يا ذيك الحكايا والصور ..
في يوم الثلاثاء الموافق 9/11/1430هـ زرت أحدى أخواتي واطلعت عندها على صور قديمه جدا وكانت الصور
لي ولإخواني وخواتي ، وكان هذا الحدث مؤثرا في نفسي …
فكتبت هذه الخواطر لتغطي الفترة الأولى من حياتي ، أيأول ما فتحت عيني على الدنيا ، حتى عام 1389هـ
يعني في حدود أربع سنوات
وأنا بدوري أهديها لكم:
1. 
أجمل صور ، فيها حكايات و عبر …. شفت القديم … وحالة تحكي عن زمان معتبر …
شاهدتها وعيني ذرفت وانا اعتبر مثل الحلوم اللي نشوفه له عبير
2.
كنا جميع ….وكنا نفرح بالقليل …
و انا بذاك الحال شكلي مختلف قبل الزواج قبل العيال ، قبل المدارك تختلف
3. 
قبل التعلم والجسم توه صغير …
وأفكاري أفكار الطيور …
وذيك الفنايل نلبسه شكله حقير …
وحافي وانا والله سعيد …
لأني ما افكر كثير
4.
كانت همومي مثل جسمي بالصغر …
وكانت ملاهينا مراجيح ،إن لقيناها تسر …
وكان الحلاو ، وعلك ابو طبعه والقريض …
واذا عطونا نشتري نركض نبي نشري بقرش …
والقرش كانت قيمته أقوى من ريال هالزمن …
أشري به وأفرح كثير
5.
وغيري يمكن ما يلاقي له ولو شي يسير …
وذاك الزمن كنا نروح لمسجد بجانب بيتنا …
وامسك إيد العم صالح للصلاة …
ما فيه مصالح ، كنا بسعاده دايمه …
ودوم نفرح بالقليل …
كأن ما مثلي يسير .
6.
ناكل ننام ….
نصحى ….
وبعدين نتهاوش مع بعض وسط النهار ونلعب بقية يومنا ….
حتى المسا …
ويازينها أيام ويازين هاذاك العبير .
7.
كلش رخيص …
وكلما لقينا شي يفرِّح …
ننسى أية مشكله …
ثم من جديد نلعب ونركض بالجديد …
وين الجديد ، يا قل والله ملبسه …
حيثه عزيز ، ولا نشوف منه كثير
8.
نلعب مصاقيل ، وكعابه ، أوعكوس …
واحيانأ أول حيد ، وطاش ، وحبيش
وغميما ، وطيرو يا عصافير مكه …
وحنا نحوس تحت الشموس
وما ننام إلا العشا …
ويازينها نومه على مدة حصير
9.
وكل يوم ناكل غدانا بشمسة البيت الكبيره …
بالظهيره …
وبالعصر نطلع بحارتنا نلقط للقموره …
نخرِّم ونصنع كفر …
مربوط في مغاط أسود لاقطينه …
ونلفها بمكار خيط صغار …
ونحطها على جالون زيت نركبه …
ونسحبه في حبل خيش سلوتلي …
ولا نتعدى حوشنا من قدنا
لأنه ما نفكر كثير .
10
ودنانتي من جنط سيكلنا …
المحلي القديم …
وقوطي جبن كرافت افك قصاصته …
ثم اعفطه وبعود وادف به الكفر …
وانا ما مثلي اسوقه بالعصا سوق الحمير.
11.
او اقطع لذاك العسيب …
واشيل منه الشوك وانا كالبطل …
وامسك عصا واركب وكني فوق خيل جامحه …
واطير فوقه كني فارس أو أمير …
خيال ما مثلي على أرضي أسير …
12.
واحيان نلعب بالدبق …
والفوز عندي ما يشق …
دايمأفوز واجمع الدبق الصغار لحال …
واعزل الكبير …
نغلب ولانغلب والى لعبنا مع بنات …
نهاش .. ثم يقال قم خلك بعيد …
ويعيرونا بأيش …. بقولتهم …
الولد مع البنات ..بطته شوكه ومات …
ثم نستحي ونروح بعيد.
13.
وعند الدبش …
نحشي ونعطي هالدبش من العلف أوالنفيع وتهوشنا أمي وتقول …
شبعانة ذيك الدبش
خوفي تموت ثم وش نصير
14.
واذكر ابوي لا اذن توضا وراح بكر للصلاة …
وانا مع امي بغرفته
واركض ابي اركب على كرسيه الجلد الخضر والعب وأدور…
و أختي تجي و تدفني
و رجليني مدلاة
وراسي بعد ما أوقف يدور
15.
واذكر يوم ايدي بيد أبوي …
يبي يسجلني أولى ابتدائي …
بمدرسة جبره بلا أجره …
عليه المشلح الأسود يلاطفني …
ووده ادرس وأكبر
ويبيني رجال أصير .
الله يا ذيك الحكايا والصور ..
