طبخ البيت !!
يا زين طبخٍ تطبخه ربَّة البيـــــــت
محكورْ يا جعل الأيادي سليمــــــه
**
ما فيه زود ابهار او ملح او زيــت
تلقى نِفَسْهَا مِنْ نفوسٍ كِرِيْمــِـــــــه
**
لا جيت جايع ألتقي ما تمنيـــــــــت
أجلس على سفرة وسيعه يتيمـــــــه
**
أمِدّ إيدي للأكل كل ما جيــــــــــــت
ريح وطعم ألقاه ربي يديمـــــــــــــه
**
كل يوم في جَوٍّ اذا أصبحت وامسيت
حشمه وإكرامٍ لنفسي وشيمــــــــــــه
**
يا الله تجزى من طعامه تغديــــــــــت
ما قصرت تعطي فنون قديمــــــــــه
**
إما جريش أبيض ولونه كما ( الليــت)
أو هو مطازيزٍ يعطر نسيمـــــــــــــه
**
أو رَقَّةَ المرقوق يا ليت يا ليــــــــــت
ليتي أذوقه ثم اعده غنيمــــــــــــــــه
**
أو رز عنبر ريحته تترس البيـــــــت
مع لحمة الخاروف حمرا سليمـــــــه
**
مع ما تهيا من خضارٍ تلقِّيــــــــــــت
أصناف من فن المطابخ وسيمــــــــه
**
ثم الحلا اللي لا تغدِّيْتْ حَلِّيــْـــــــت
تَطْلِيْ وْجِلِيْ وِصْحِيْنَ مِنْ هالكْرِيْمِـة
**
نعمة علينا ما شكرته ولا اجزيـــــت
واسأل إلهي دوم ربي يديمـــــــــــه
**
يالله تجزى من على البعد خليــــــت
كلما ذكرته اجعل لذيك قيمــــــــــــه
**
ولا قصورٍ باللي عندي ونَقِّيــــْـــــت
لكن هوا بالي عطيته حشيمـــــــــــه
**
ما يجحد المعروف غير الذي مِيـْـت
حقَّهْ نأدي والجحايد ظليمـــــــــــــــه
حمد بن عبدالله العقيل
ربيه – العارضة
1437/1/1هـ
